السلام عليكم ورحمته الله وبركاته
بوست جديد وخفيف بتكلم فيه عن منتجات بنفت اللي عندي ..~
وبقولكم رأيي عن كل منتج وبصراحه تامه :$
نبدأ
بنفت ماركه معروفه وغنيه عن التعريف منتجاتها مميزه جداً
وكل منتج عندهم يخدم كل أنثى
ابتداءً من الشكل الى جوده المنتج
كأنهم جالسين يكتشفون كل بنت ايش تحتاج ويحاولون يحلون كل مشكله نعاني منها )
وينجحون بحلها)ا
وبالفتره اللي فاتت صار الاقبال على منتجات بنفت كبير ما شاء الله
ولا استغرب هالشئ لان فعلا يستاهلون
صوره جماعيه للمنتجات اللي عندي :
* اضغطو على الصوره لتكبير
كل منتج بالصوره
ما ندمت ابدأ اني شريته
لان طبعي بالبدايه اقرا عن كل شئ انوي اشتريه
سواء بمدونات اجنبيه او عربيه
و هالشئ انصحكم فيه
واحيانا ممكن تشترين شئ بعد مديح بس مايطلع مناسب لك
او ماحسيتيه يستاهل المدح اللى جاه
بس منتجات بنفت ماتحسفت فيهم
حتى لو المنتج مو قوي بس بيجي له غرض تستخدمينه فيه
يعنى ما تركنينهم وتتحسرين على اللى دفعتيه
مثل بعض الماركات :)
بتكلم لكم عن كل منتج وايش يسوي بالضبط
تقيمي له من 5 وهل برجع اشتريه أو لا
-1-
Benefit They're Real Mascara
ماسكرا ذير ريل من بنفت
ماسكرا بنفت المشششهوره
من اروع الماسكرات تكثف وتطول الرموش وتعطيك طله جميله جداً
اتمنى فعلا كل بنت تجربها وتحكم بنفسها
وما اتوقع تندمين
تقيمي 5/5
برجع اشتريها بكل تأكيد
-2-
The Pore fissional
بروفيشنال من بنفت للمسامات
وهل يخفى القمر !!!!
اسمي هذا المنتج بالسحر لان منقذ لكل بنت
تعانى من مسامات خفيفه
يخفى المسامات تماماً ويعطيك ملمس ومظهر نعوم للوجهه
ولو بشرتك صافيه مافيها حبوب تقدرين تستخدمينه لوحده بالايام العادية مع بودره من بنفت
ولا بتحتاجين للاساس
البنات اللي يقولون عن المنتج انه مو مفيد
هم حده من ثنتين
اما ان بشرتها ماتعاني من مسامات ابدا ! - ماشاء الله
او ان بشرتها تعاني من مسامات ماتندرج تحت الخفيفه - يارب فهمتو
وهو خاااااص للمسامات و هالشئ موضح بالعلبة ما فيك مسامات لا تشترينه
تقيمي 5/5
برجع اشتريه بكل تأكيد
-3-
stay don't stray primer
ايش هذا ؟ برايمر للعين وللكونسيلر
يعنى قبل ماتحطين الشادو او الكونسيلر
تحطين منه نقط قليله حولين العين يعنى تحت بمنطقه الهالات
وفوق بمنطقه الشادو ليه ؟ ايش دوره ؟ وش استفيد ؟
لما تحطينه قبل الشادو يضمن لك ان الشادو يثبت لوقت طويل ويبرز لك اللون
وقبل الكونسيلر يثبت لك الكونسيلر اكثر وما يبين خطوط اللى تسببها بعض الكونسيلرات
وصراحه انا استخدمه لوحده بدون كونسيلر
لان يؤدي الغرض خصوصا بالأيام العادية او زياره عائليه
واللي حبيته انه فيه ترطيب
يعنى لما تحطينه تحت عينك او فوقها ماتحسينه يجفف المنطقة
شفت منه درجتين الفاتحه والمتوسطة
واخذت المتوسطة لان الفاتحة بزياددده فاتحة
اذا ماكنتِ من النوع اللي يحط شادو للعين لا تشترينه
تقيمي 5/5
اعيد واكرر تستفيد منه البنوته للي تحب تحط مكياج كامل للعين
برجع اشتريه ؟ ممكن
-4-
بودره دالاس + هولا
عشق لاينتهي بكل طلعه استخدمهم
لونهم بني غامق
مناسبه لصديقات التان و الكونتور و اللى تحب توحد لون بشرتها
بلون غامق
من اجمل البودرات اللى استخدمتهم
هولا شبه مخلصه والفرشه تقول اعتقيني ههههههه
تقيمي 5/5
برجع اشتريهم ؟ ممكن مع ان ودي اجرب الانواع الثانيه :$
قبل ما اشتريهم من جديد
-5-
بودره sugar bomb
جات مع البوكس
البودره ناعمه جداً تعطيك لوك طبيعي
اللى تحب اللوكات النعومه والبسيطه بتعجبها
وفيها لمعه
تقيمي 5/4
ماحبيت لمعتهاا احسها كثيره
بشتريها ؟ ما اتوقع
-6-
bene tint
كثيييييير كثيررر تكلمو عنه
لونه احمر ممكن تحطينه ع شفايفك و خدودك
ويعطيك لون خفيف ولوك حللوو
حبيته على الخد اكثر من الشفاااايف يعطى طله حلوه
وثاااابت لوقت اطول :$
ريحته جميله
تقيمي 5/5
برجع اشتريه ؟ ماتوقع لاني ابي اشتري
الـ posie tint
اللي جربته تنصحني اشتريه ؟ :$
-7-
high beam
ايضاً كثيييييير تكلمو عنه وكثير مدحوه
هو اضاءه للوجهة أو ممكن تستخدمينه للجسم
بس انا مو من عشاق الاضاءة بس بما انه عندي
لازم استخدمه ههههه
تقيمي 5/5
برجع اشتريه ؟ لا
-8-
sugar bomb قلوووسس
قلوسس لونه حلو كثير
الايام اللي فاتت بس استخدمه
خصوصا اذا كنت بروح لزياره عائلية ما احب احط روج :$
تقيمي 5/5
برجع اشتريه ؟ لا
-9-
high BROW
اضاءة لتحت الحاجب حلو لونه كثير
ينفع للمناسبات :)
تقيمي 5/3
فيه نقطه ما عجبتي فيه ان يجي القلم بدون براية
وهالشئ غلط لان حجم القلم كبير مو مثل حجم اقلام الاكحال
والبعض ممكن ماعنده برايه بنفس المقاس فً بيتوهق فيه
باختصار مفروض يحطون معه براية خاصه
لان الحين الماركات الثانية تحط مع الكحل براية ومقاس القلم مقاس طبيعي
ويكون عندي 10 برايات تناسب لتبريه الكحل
برجع اشتريه ؟ لا
,,,,,,,,
بكذا اكون انتهييييييييييت من البوسسست
بالختام منتجات بنفت رائعه جداً
واشوف انها مناسبة اكثر للبنوتات اللى يحبون اللوكات
الطبيعية والنعومة
وصراحة كل الانواع اللى تكلمت عنهم في البوست اقدر استخدمهم
بالمناسبات العائلية او الدوامات والطلعات السريعه
بدون ما اضيف عليهم الا كحل من ماركة ثانية
أو ايلاينر
والحلو فيهم يحطون لك الخطوات كل منتج بالبروشور
أو خلف العلبة
وايضاً عندهم قناه باليوتيوب
تقدرين تشوفين فيها منتجاتهم
وطريقة استخدامها
من هنا
بالنسبة للاسعار
أغلب المنتجات سعرها فوق الـ 150 تقريباً
اماكن تواجد بنفت بالسعودية
سيفورا , وجوه
اكاونت بنفت بتويتر : @BenefitBeautyME
@benefitmiddleeast : اكاونت بنفت بالانستقرام
سؤالي لكِ : قد جربتي احد المنتجات بالبوست ؟ ايش هو؟
وايش رايك فيه !
لتواصل معي :
أو برساله على الايميل :
Inspiration_spot@hotmail.com
