دليل المجمعات والمحلات في مدينه الخبر - متجدد

السلام عليكم ورحمته الله وبركاته

 
مرحبا جميعاً بما اننا بالاجازه الصيفيه فً تكثر الرحلات والسفرات
واكيد البعض بيجي عندنا فً

بخصص كم بوست لزوار المنطقه الشرقيه - مدينه الخبر تحديداً

بذكر لكم المطاعم والمقاهي والمجمعات ومحلات الملابس وغيرها

وهالبوستات بتكون متجدده بكل فتره بضيف لها شئ جديد

وكل مكان جربته بحط لكم تقيمي عنه :)
 

 

نبدأ بالبوست الاول المجمعات ومحلات لتسوق بالخبر :

 

اكبر مجمعين عندنا هم:

 الراشد و مجمع الظهران

 

الراشد يكفيكم يوم

اما الظهران يحتاج يومين لانه كبير جداً ومتعببب

 

أي محل انتِ رايحه له بالتحديد حاولي تعرفين رقم البوابه ومكانه بالضبط

من النت أو اسألي الاستعلامات بنفس المجمع علشان وقتك مايضيع :)

 

مجمع الراشد

 

يحتوى المجمع على 

-1-

 شقق فندقيه - الراشد ريزيدنس

في بوابه توديكم من الفندق الى المجمع

 

موقع الراشد ريزيدنس

 

هنا

 

ماجربتها بس قريت أراء كثيره والكل يمدحهم

 

-2-

قسم خاص بالماركات العالمية

كوتش - كارتير - جوسي - فرزاتشي

موسكينو - فالنتينو - .... والكثيررر

 

-3-

محلات العاديه : زارا - مانجو - محلات للجلابيات - للعبايات ... الخ

 

-4- 

العاب مخصصه للاطفال - مطاعم - قهاوي 

 

-5-

سوبرماركت كارفور  - صيدليات - مكتبه جرير وغيرها

-6- 

 قيصريه الراشد
بالتوسع بالدور الاخير
تصميمه تراثي وفيه محلات وقهوه ومطعم

تويتر المجمع : @Rashidmall

 

 

مجمع الظهران

 

 

المنطقه : حي الدوحة الجنوبية

تقاطع طريق الملك سعود مع طريق الامير فيصل بن فهد  

يحتوى المجمع على :

 

-1-

ماركات عالميه

CH - مايكل كورس - كوتش - موسكينو 

ارماني - Tommy Hilfiger ... الخ

 

-2-

محلات العاديه : زارا مانجو H&M

سنتر بوينت - محلات فساتين - للعبايات - للجلابيات

 

-3-

العاب للاطفال - حضانه للاطفال - مطاعم متنوعه جداً

وقهاوي

 

المطاعم و القهاوي في بوابه 5 وبوابه 9 و 10  

 

-4-

 سوبرماركت بنده و مكتبه العبيكان وصيدليه

 

 

أمواج - مقابل مجمع الظهران

 

في سوبر ماركت بنده و ايكيا و مجموعه مطاعم ومقاهي

ومحلات ايس كريم ( باسكن روبنز و ماربل سلاب )

تويز ار اص - مكتبه جرير

محلات اجهزه جوالات الكترونيات

ستي ماكس و Go sport

السيف للاواني المنزليه

و روائع المكتبات فيه قسم فوق للاطفال رائع جداً

فيه غرف وكل غرفه تدفعين لها ويتعلم طفلك مهنه معينه

وفيه كم محل

 

 

و السويكت اتوقع انه معروف فيه محلات اقمشه وأواني منزليه وعبايات ... واالكثيرر 

عباره عن محلات على الشارع اذا قد مدح لك احد محل معين روحي له رأساً

لان اجوائنا ماتساعد تمشين فيه وماينفع تأخذين أطفالك معك

لان كله زحمه سيارات وعمالات مختلفه في كل مكان * يخوف * ههههههه   

 

 

مجمع فينيسيا 

قريب من مجمع الراشد ماقد دخلته صراحه

بس من برا مبين فيه العاب ومطاعم ومحلات 

 

 

 كورنيش الخبر

قريه القصيبي
 

شارع الامير تركي مقابل فندق المريديان

 

هو عباره عن مجموعه محلات مثل رباعيات  

اللى مايعرف رباعيات هو محل يبيع ملابس وشوزات وشنط

من ماركات عالميه :)

وفي محلات جلابيات وكم محل لمصصمات سعوديات ومحلين نظارات اتوقع

وقهاوي ومطاعم

و Godiva  للشوكولا معروف 

وفي محلات من الجهه الخلفيه للقريه مو بس المحلات اللى على الشارع 

 

 

ولما تطلعون من قريه القصيبي بتقابلكم اشاره تعدوها على يساركم بتشوفون

مجمع فؤاد سنتر سابقاً كان فيه محلات بس حالياً تحول لمجمع مطاعم

و ما ادرى اذا لسه فيه داخل محلات او لا

وايضاً بتشوفون مجموعه مطاعم متوزعه على امتداد الكورنيش  

 

وعلى اليمين على امتداد الشارع بتشوفون مجموعه مطاعم وقهاوي جميله جداً وفيه كم محل ملابس  

مثل زارا و الدو ومذركير وكم محل ..ْ 
 

 

الكورنيش خصوصا انصحكم تراعون اوقات روحتكم له

لانه مابترتاحون بالزحمه وبيضيع وقتكم عند الاشارات ولا راح تلقون مواقف

 

 

واهم شارع شارع البيبسي سابقاَ ( شارع الامير فيصل بن فهد )

هالشارع فيه مجموعه كبيره من المطاعم و القهاوي ومحلات حلويات وتقديمات

و كم محل ملابسس وفساتين


سايتك - مركز سلطان بن عبدالعزيز للعلوم والتقنيه
المركز مره حلو وتثقيفي للكبار والصغار
بكورنيش الخبر  
للاطلاع على موقعهم : http://scitech.sa/ar/index.php 

نصيحتي لكل مسافر ابحث عن المكان اللى بتروح له
وطلع قائمات بأهم المجمعات والفنادق والمطاعم وغيرها
واكتب عندك ارقامها واماكنها
تحديد المكان بالغالب يكون سهل مع التطبيقات اللى بالجوالات
تحددون فيها المحل ويوصف لكم بالخريطه :)

ونصيحه اخرى قبل ماتروحون أي مطعم كلموهم واحجزو لكم طاوله
لان بهالفتره الزحمات بكل مكان :)


اذا تذكرت شئ ثاني بحدث البوست وبنبهكم
واللى يبي يضيف شئ يراسلني

ان شاء الله تستفيدون
انتظروني ببوست المطاعم والقهاوي

 

 أي اقتراح أو أستفسار عن أي شئ بالبوستات
لتواصل معي : 
 

  

 Inspiration_spot@hotmail.com الايميل 


 

جربتي شئ قد ذكرته واستفدتي منه اكتبي لي هنا

http://ask.fm/InspirationSpot